Granda penso, ke libere
kulpon, virton ni elektas,
tamen scias ni, ke ŝilde
Dia graco nin protektas.
Agu do, kaj vin ne ĝenu,
se maldankos la popolo,
ne al dank' en granda ago
celu, sed al memvaloro,
ĉar vi hontus ne agante.
Kaj pro l' hontkonscio devas
aĉa hom' fiksiĝi tere,
bravan ĝi al Dio levas.
Sed sur via vojo alta
ne blindigu vin eraro,
ke por glor' de Dio agas
ĝuste vi per via faro,
kaj al Dio, kiel ilo
providenca, vi necesas,
eĉ, honoras vin, se al vi
por Li agi Li permesas.

"Ĥoro de anĝeloj" fine de Tragedio de l' homo de Imre MADÁCH (1823-1864)
Tradukis Kálmán KALOCSAY
La tuta dramo aperis libroforme en 1965 ĉe Eldonejo Corvina (Budapest)
Originala titolo: Az ember tragédiája